“Yüksəliş” müsabiqəsinin Qabiliyyət imtahanı keçirilib

01.03.2020
Martın 1-də “Yüksəliş” müsabiqəsinin Onlayn mərhələsinin Qabiliyyət imtahanı keçirilib. İştirakçılar saat 11:00 və 15:00 olmaqla 2 sessiyada testə qatılıblar. İmtahanda 7056 namizəd iştirak edib.

İmtahanda abstrakt və məntiqi düşüncənin, rəqəmsal və verbal məlumatlarla işləmək bacarığının yoxlanılması üzrə olmaqla 3 bölmədə suallar təqdim edilib.

Əsas imtahanda iştirakçılar abstrakt və məntiqi düşüncənin yoxlanılması üzrə 20 suala ümumilikdə 20 dəqiqə, rəqəmsal məlumatlarla işləmək bacarığının yoxlanılması üzrə 18 sualın hər birinə 2 dəqiqə ərzində cavab veriblər. Verbal məlumatlarla işləmək bacarığının yoxlanılması bölməsində 6 mətn və hər mətnə aid 5 sual (cəmi 30 sual) təqdim olunub. Hər mətni oxumaq üçün 2 dəqiqə, hər suala cavab vermək üçün 2 dəqiqə vaxt ayrılıb.

Xatırladaq ki, “Yüksəliş” müsabiqəsinin Onlayn mərhələsinin hər iki imtahanı Dövlət İmtahan Mərkəzi ilə əməkdaşlıq çərçivəsində təşkil olunub. Onlayn mərhələni başa vuran iştirakçıların nəticələri 2 həftə ərzində şəxsi kabinet vasitəsilə təqdim ediləcək. T-şkalası əsasında ən yüksək nəticə göstərən 1000-ə yaxın iştirakçı növbəti mərhələyə buraxılacaq.